लुम्बिनी प्रदेशको सभामुखमा घर्ती र उप सभामुखमा खाण निर्विरोध निर्वाचित

कपिलवस्तु । लुम्बिनी प्रदेशसभाको सभामुख पदमा नेकपा माओवादी केन्द्रका तुलाराम घर्ती मगर निर्विरोध निर्वाचित भएका छन् भने उप सभामुखमा राप्रपाकी मेनुका खाण केसी निर्विरोध निर्वाचित भएकी छन् ।

प्रदेशसभामा निर्वाचन कार्यतालिका अनुसार सोमबार भएको उम्मेदवारी दर्तामा सभामुख पदमा घर्तीको एकल उम्मेदवारी परेको थियो तर उप सभामुख पदमा भने नेपाली कांग्रेस र राष्ट्रिय उन्मुक्ति पार्टीले पनि उम्मेद्धारी दर्ता गराएका थिए । आज भने कांग्रेस र उन्मुक्ति पार्टीका उम्मेद्धारले आफ्नो उम्मेद्धारी फिर्ता लिएसँगै उप सभामुख पनि निर्विरोध बनेको हो ।

प्रदेश सभामुखका उम्मेद्धार घर्तीलाई सभामुख पदमा निर्वाचित गर्न नेकपा एमालेका प्रदेशसभा सदस्य भूमिश्वर ढकाल प्रस्तावक र राष्ट्रिय प्रजातन्त्र पार्टी राप्रपाका आशिषकुमार चौधरी समर्थक रहेका थिए ।

प्रदेशसभाको आजको बैठकमा कार्यसूचीअन्तर्गत सभाका ज्येष्ठ सदस्यले सभामुख पदमा घर्तीमगर निर्विरोध निर्वाचित भएको घोषणा गरेका हुन् । संविधानको धारा १८२ को उपधारा १ बमोजिम सभामुख पदमा प्रदेशसभाको पहिलो बैठक प्रारम्भ भएको मितिले १५ दिनभित्र प्रदेशसभाका सदस्यहरूले आफूमध्येबाट प्रदेश सभामुख र प्रदेश उपसभामुख निर्वाचित गर्नुपर्ने व्यवस्था रहेको छ ।

नवनिर्वाचित सभामुख घर्तीले आफूले सबैको सहयोग र सहकार्यबाट प्रदेशसभालाई अघि बढाउने बताए । उनले प्रदेशमा आवश्यक कानून निर्माणका लागि सबै पक्षसँग आवश्यक छलफल गरी अघि बढ्ने बताए ।