एमाले केन्द्रीय निर्वाचन कमिटी सदस्य पौडेलले गरे पार्टी परित्याग

बुटवल । नेकपा एमाले केन्द्रीय निर्वाचन कमिटी सदस्य खुमाकान्त पौडेल ले पार्टी परित्याग गरेका छन्। रुपन्देही क्षेत्र नं. २ अन्तर्गत तिलोत्तमा नगरपालिका–३ का बासिन्दा पौडेलले पार्टी नेतृत्वप्रति गम्भीर असन्तुष्टि जनाउँदै एमालेबाट अलग भएको घोषणा गरेका हुन्।

जिल्ला अध्यक्ष यज्ञ गैरे लाई सम्बोधन गरी लेखेको राजीनामा पत्रमा पौडेलले एमालेभित्र पछिल्लो समय अधिनायकवाद, नातावाद, गुटगत मानसिकता, खोक्रो राष्ट्रवाद र भ्रष्टाचार मौलाउँदै गएको आरोप लगाएका छन्। गाली–बेइज्जतीको संस्कृति र मोलाहिजाको राजनीतिसँग आफू सहमत हुन नसकेकाले पार्टी छाड्न बाध्य भएको उनको भनाइ छ।

पार्टी परित्यागपछि आफू स्वतन्त्र राजनीतिक भूमिकामा रहने पौडेलले बताएका छन्। उनी एमाले नेता लिला गिरी मुख्यमन्त्री हुँदा प्रदेश सरकारको मुख्य न्यायाधिवक्ता नियुक्त भएका थिए। साथै, एमाले सरकारकै पालामा उनी कानुन आयोगको सदस्य समेत थिए।

पौडेलको राजनीतिक यात्रा तत्कालीन प्रजातान्त्रिक राष्ट्रिय युवा संघ रुपन्देहीका अध्यक्ष बाट सुरु भएको थियो। उनी तीन कार्यकाल एमाले रुपन्देहीको सचिवालय सदस्य, इलाका र क्षेत्रीय कमिटी सदस्यसमेत रहिसकेका छन्।

राजीनामापत्रमा उनले आफूलाई सरकारी जिम्मेवारी दिन सहयोग गरेको भन्दै उपाध्यक्ष विष्णु पौडेल, महासचिव शंकर पोखरेल र तत्कालीन मुख्यमन्त्री लिला गिरीप्रति आभार व्यक्त गरेका छन्।