रास्वपा प्रवेश गरेका विजयनगरका उपाध्यक्ष र वडा अध्यक्षको पद रिक्त

कपिलवस्तुको विजयनगर गाउँपालिकाका २ जनप्रतिनिधि पद मुक्त भएका छन् । उपाध्यक्ष लक्ष्मी कुमारी चौधरी र वडा नम्बर ५ का वडा अध्यक्ष अनवर मोहम्मद मुसलमानको निर्वाचित पद रिक्त भएको छ । निर्वाचन आयोगले असोज २३ गते सूचना जारी गर्दै दुवै जनाको पद रिक्त भएको जनाएको हो ।

नेकपा (एमाले) बाट निर्वाचित चौधरी र मुसलमानले पार्टीको विधान विपरीत कार्य गरी दल त्याग गरेको भन्दै पार्टीको केन्द्रीय सचिवालयबाट निर्णयसहित जानकारी प्राप्त भएपछि आयोगले पद रिक्त हुने निर्णय गरेको सूचनामा उल्लेख छ ।

राजनीतिक दलसम्बन्धी ऐन, २०७३ को दफा ३२ को उपदफा (१) र राजनीतिक दलसम्बन्धी नियमावली, २०७४ को नियम २२ बमोजिम दल त्यागसम्बन्धी कानुनी प्रक्रिया पूरा भएपछि आयोगले उनीहरूको निर्वाचित पद रिक्त भएको जनाएको हो ।

चौधरी २०७९ सालको स्थानीय तह निर्वाचनमा विजयनगर गाउँपालिकाको उपाध्यक्षमा निर्वाचित भएकी थिइन् भने मुसलमान वडा नम्बर ५ को वडा अध्यक्षमा निर्वाचित भएका थिए । उनीहरू गत भदौ ५ गते राष्ट्रिय स्वतन्त्र पार्टी (रास्वपा) मा प्रवेश गरेका थिए ।