दीपावलीको आतिशबाजीपछि भारतको नयाँदिल्ली धुवाँले ढाकियो

दीपावलीको अवसरमा नागरिकले गरेको आतिशबाजीपछि भारतको राजधानी शहर नयाँदिल्ली धुवाँले ढाकिएको छ । दीपावलीको उत्सवले दिल्लीको वायु प्रदूषणलाई खतरनाक स्तरसम्म पुर्‍याएको छ ।

पटाका पड्काएपछि हावामा धुवाँ र सूक्ष्म कणहरूको मात्रा बढेकाले प्रदूषण र स्थिर मौसमको अवस्थासँग मिसिएर वातावरणलाई झन् विषाक्त बनाएको त्यहाँको मौसमसम्बन्धी निकायलाई उद्धृत गरी भारतीय सञ्चारमाध्यमले जनाएका छन् ।

नयाँदिल्लीका धेरैजसो क्षेत्रमा वायु गुणस्तर सूचकाङ्क (एकयूआई) तीन सय ५० नाघेको अवस्था थियो । जुन विश्व स्वास्थ्य सङ्गठनको मापदण्डअनुसार ‘गम्भीर’ स्तर हो र सास फेर्न नै खतरनाक मानिन्छ ।

भारतको सर्वोच्च अदालतले गएको हप्ता कम प्रदूषण उत्सर्जन गर्ने ‘हरित पटाका’ को सीमित प्रयोगलाई अनुमति दिँदै दीपावलीका बेला पटाकामाथिको पूर्ण प्रतिबन्ध केही हदसम्म फुकुवा गरेको थियो । पर्यावरणविद्हरूले प्रदूषणबाट उत्पन्न सङ्कट अन्त्य गर्नका लागि स्वच्छ ऊर्जाको प्रवर्द्धन, सार्वजनिक यातायातमा सुधारलगायतका दीर्घकालीन समाधान अनिवार्य रहेको बताउँदै आएका छन् ।