कश्मीर लक्षित आक्रमण गर्‍यौँ : भारत

भारतीय सशस्त्र बलले बुधबार ‘अपरेसन सिन्दूर’ सुरु गर्दै पाकिस्तान र पाकिस्तान नियन्त्रित कश्मीर (पीओजेके)मा रहेका नौ ‘आतंकवादी’ केन्द्रहरूमा लक्षित आक्रमण गरेको बताएको छ । 

यो कारबाही पहलगाममा भएको आतंकवादी हमलामा २६ जनाको ज्यान लिएपछि गरिएको बताएको टाइम्स अफ इन्डियाले जनाएको छ ।

रक्षामन्त्रीको कार्यालयले प्रकाशित आधिकारिक विज्ञप्तिमा भारतीय सशस्त्र बलले ‘̍अपरेसन सिन्दूर’ सुरु गरी भारतविरुद्ध आक्रमण योजना गर्ने केन्द्रहरू रहेका पाकिस्तान र पीओजेकेका आतंकवादी अखडाहरूमा प्रहार गरेको बताएको छ ।

यो अभियानले मितव्ययी र सीमित रणनीतिमा आधारित नौ विशिष्ट स्थानहरूलाई लक्षित गरिएको बताइएको छ । तर, जानाजान पाकिस्तानी सैन्य सुविधाहरूलाई निशाना नबनाइएको उल्लेख छ ।

मन्त्रालयले भारतले पहलगाम घटनाप्रति प्रतिक्रियास्वरूप सावधानीपूर्वक लक्ष्य र योजनाहरू चयन गरेको पनि बताएको छ । 

मन्त्रालयले यस हमलाका पछाडि जिम्मेवारहरूप्रति जवाफदेही सुनिश्चित गर्ने संकल्प गरेको छ । आज दिउँसो ‘अपरेसन सिन्दूर’ को विस्तृत जानकारी सार्वजनिक गर्ने घोषणा गरिएको छ ।