कोइलीचौर सामुदायिक वनमा वृक्षरोपण

कपिलवस्तु । कपिलवस्तुको बाणगंगा ९ स्थित कोइलीचौर साना किसान सामुदायिक वन उपभोक्ता समुहले वनको खाली क्षेत्रमा वृक्षरोपण गरेको छ । खाली घाँसे मैदान र बगर क्षेत्रमा तारबार गरी सामुदायिक वनले करिब ५ सय विभिन्न जातका बिरुवाहरु रोपेको हो ।

सामुदायिक वनका अध्यक्ष कुन्तामणी भुसालका अनुसार पछिल्लो समय वन क्षेत्रमा मासिदै गएको दुर्लभ बिरुवा सत्तिसाल पनि रोपिएको छ । उनले सत्तिसाल बहुउपयोगी बिरुवा रहेको भन्दै सामुदायिक वनले यसपटक वन क्षेत्रमा उक्त बिरुवा २ सयको संख्यामा रोपिएको जानकारी दिए । यस्तै कोइलीचौर साना किसान सामुदायिक वनले आँप, कटहर, अम्बा, अमला, लगाएतका बिरुवा पनि उक्त क्षेत्रमा लगाएको छ ।

यसबाहेक सामुदायिक वनले विजय सालबाट विभिन्न भाँडा उत्पादन गर्ने कार्यको सुरुवात गरेसँगै वन क्षेत्रमा बिजयसाल संरक्षण तथा त्यसको उत्पादनमा पनि जोड दिएको अध्यक्ष भुसालले बताए ।

अहिले हाम्रो सामुदायिक वनमा विजय सालका बिरुवा धेरै भेटिएको छ, हामी ठूला साना सबै विजयसालका बिरुवाहरु संरक्षण गर्ने र नयाँ बिरुवा पनि रोप्ने अभियानमा छौँ, उनले भने ।

वन उपभोक्ता समुहका सदस्यहरु तथा कार्यसमिति तथा विभिन्न समयमा कामदार लगाएर पनि यसपटक बिरुवा रोपिएको उनले जानकारी दिएका छन् । अघिल्ला वर्ष वृक्षरोपण गरिएका क्षेत्रमा समेत रोपिएका बिरुवा हुर्किएका र यसले वातावरण संरक्षण र वन विकासमा आउँदा पुस्तालाई पनि टेवा पुग्ने वन कार्यसमितिले विश्वास व्यक्त गरेको छ ।

कोइलीचौर साना किसान सामुदायिक वन कपिलवस्तु जिल्लाको पुरानो सामुदायिक वन हो । यो सामुदायिक वन वि.सं. २०४५ सालमा स्थापित सामुदायिक बन हो । कपिलवस्तु जिल्लाकै जेष्ठ सामुदायिक बनको रुपमा रहेको यो बन २ सय १८ हेक्टर क्षेत्रफलमा रहेको छ भने सामुदायिक बनमा करिब ५ सय उपभोक्ताहरु आबद्ध रहेका छन् ।