प्याराग्वेसँग गोलरहित बराबरी खेल्दै अस्ट्रेलिया विश्वकपको नकआउट चरणमा

प्याराग्वेसँग कडा प्रतिस्पर्धाबीच ०–० गोलको बराबरी खेल्दै अस्ट्रेलिया जारी २०२६ फिफा विश्वकपको नकआउट चरण (अन्तिम ३२) मा प्रवेश गरेको छ। क्यालिफोर्नियास्थित लेभिस स्टेडियममा बिहीबार भएको खेलमा प्राप्त १ अङ्कसँगै अस्ट्रेलिया समूह ‘डी’ को उपविजेता बन्दै अर्को चरणमा पुगेको हो ।

समूह चरणमा अस्ट्रेलियाले कुल ४ अङ्क जोड्यो। आफ्नो पहिलो खेलमा टर्कीलाई पराजित गरेको अस्ट्रेलिया दोस्रो खेलमा अमेरिकासँग पराजित भएको थियो। प्याराग्वेविरुद्धको निर्णायक खेलमा अस्ट्रेलियामाथि खासै ठुलो संकट नआए पनि टोलीले गोल भने गर्न सकेन। विश्वकप इतिहासमा अस्ट्रेलियाले सात पटक सहभागिता जनाएकामा समूह चरण पार गरेको यो तेस्रो पटक हो।

यता, अस्ट्रेलियासँगको यस बराबरीले प्याराग्वेको पनि नकआउट चरण पुग्ने सम्भावना बलियो बनाएको छ। प्याराग्वे उत्कृष्ट आठ तेस्रो स्थानमा रहने टोलीका रूपमा अर्को चरणमा पुग्ने दौडमा छ।

यसै समूहको अर्को खेलमा टर्कीसँग ३–२ ले पराजित भए पनि अमेरिका यसअघि नै समूह ‘डी’ को शीर्ष स्थान सुरक्षित हुँदै अघिल्लो चरणमा पुगिसकेको छ।