कपिलवस्तुका छुट्टाछुट्टै स्थानबाट लागुऔषधसहित ६ जना पक्राउ

कपिलवस्तु । कपिलवस्तुबाट प्रहरीले लागुऔषध सहित ६ जनालाई पक्राउ गरेको छ । जिल्लाका विभिन्न स्थानबाट प्रहरीले लागुऔषध ब्राउन सुगर जस्तो देखि पदार्थसहित छुट्टाछुट्टै स्थानबाट उनीहरुलाई पक्राउ गरेको जनाएको हो ।

जिल्लाको शुद्धोधन गाउँपालिका–३ लवनी चोकबाट अवैध लागूऔषध ब्राउनसुगर जस्तो देखिने पदार्थ करिब ६ सय ३० मिलिग्राम, नगद ६९ हजार ५ सय रुपैयाँ र मोबाइल १ थानसहित पाल्पाको तानसेन नगरपालिका–१ मौरीगाउँ बस्ने ३३ वर्षीय विवेक खातीलाई मंगलबार दिउँसो प्रहरीले पक्राउ गरेको छ ।

यसैगरी कपिलवस्तुको वाणगंगा नगरपालिका वडा नम्बर ११ प्रोजेक्ट टोलबाट अवैध लागूऔषध ब्राउनसुगर जस्तो देखिने पदार्थ २ ग्राम ९ सय मिलिग्रामसहित रूपन्देहीको बुटवल उपमहानगरपालिका–६ बस्ने ३६ वर्षीय युगल भट्टराईसहित ४ जनालाई मंगलबार बेलुकी प्रहरीले पक्राउ गरेको जानकारी दिएको छ ।

अस्थायी प्रहरी पोष्ट ओदारीबाट खटिएको प्रहरीले बा.२० च ९८३२ नम्बरको कारलाई जाँच गर्ने क्रममा कारमा सवार उनीहरूलाई उक्त पदार्थसहित पक्राउ गरेको हो ।