कोरोना भाइरसविरुद्ध रुसले बनाएको खोपले काम गर्छ : ट्रम्प

वासिङ्टन — अमेरिकी राष्ट्रपति डोनाल्ड ट्रम्पले कोरोना भाइरसविरुद्ध रुसले बनाएको खोपले काम गर्ने विश्वास व्यक्त गरेका छन् । ‘मलाई रुसले बनाएको भनिएको खोपबारेमा धेरै थाहा छैन । तर त्यो खोप प्रभावकारी र उपयोगी हुन्छ भन्नेमा मलाई विश्वास छ,’ उनले भने ।

राष्ट्रपतिको कार्यालय ह्वाइटहाउसमा भएको पत्रकार सम्मेलनमा बोल्दै ट्रम्पले खोपले काम गर्ने बताएका हुन् । रुस कोरोनाविरुद्धको खोप तयार पार्ने विश्वकै पहिलो राष्ट्र भएको पनि उनको दाबी छ । ‘मलाई जानकारी भएसम्म कोरोनाविरुद्धको खोप तयार पार्ने रुस विश्वकै पहिलो मुलुक भएको छ, यो दर्ता भइसकेको पनि मैले थाहा पाएको छु,’ उनले भने । ट्रम्पले चाँडै नै ठूलो मात्रामा सो खोपको उत्पादन र प्रयोग हुन थाल्ने विश्वास व्यक्त गरे ।

आधारभूत प्रक्रियाहरू पूरा गर्ने र परीक्षण सबै सफल भएपछि आधिकारिक निकायले त्यसको प्रयोगका लागि स्वीकृति दिने उनको भनाइ छ । नयाँ खोप प्रक्रियामा गएको छ र अहिलेसम्म सकारात्मक नतिजा आएको थाहा पाउँदा आफूलाई निकै खुसी लागेको उनले बताए ।