अर्घाखाँचीमा भरुवा बन्दुकसहित एक व्यक्ति पक्राउ

अर्घाखाँची | अर्घाखाँची जिल्लाको शितगंगा नगरपालिका–१२ बस्ने ३६ वर्षीय संदिपबहादुर कामीलाई प्रहरीले अवैध हातहतियारसहित पक्राउ गरेको छ।

इलाका प्रहरी कार्यालय ठाडाबाट खटिएको प्रहरी टोलीले संदिपबहादुरको गोठमा खोजतलासी गर्दा एक नाले भरुवा बन्दुक बरामद गरेको हो। प्रहरीका अनुसार उनको साथबाट बारुद जस्तो देखिने पदार्थ, फलामका टुक्रा र बन्दुकको केप बनाउँदा प्रयोग हुने कागजका टुक्राहरू समेत फेला परेका छन्।

प्रहरीले हातहतियार तथा अन्य सामग्री बरामद गरेपछि कामीलाई नियन्त्रणमा लिई आवश्यक अनुसन्धान अघि बढाइएको जनाएको छ।

यस घटनासँग सम्बन्धित थप विवरण संकलन भईरहेको प्रहरीले जनाएको छ।