घरायसी विवादका क्रममा श्रीमानले गरे श्रीमतीको हत्या

दाङको बंगलाचुली गाउँपालिका–४ जुम्लेपानीमा श्रीमान्‌ले श्रीमतीको हत्या गरेका छन्। मादकपदार्थ सेवनपछि भएको घरायसी झगडामा जागेश्वर पुनले ५० वर्षीया श्रीमती गोमा पुनको लठ्ठी प्रहार गरी हत्या गरेको प्रहरीले जनाएको छ।

बिहीबार राति करिब १० बजे घरायसी विवाद हुँदा जागेश्वरले लठ्ठीले हान्दा गोमाको मृत्यु भएको हो।

प्रहरीको प्रारम्भिक अनुसन्धानअनुसार उनीहरूबीच लामो समयदेखि घरेलु झगडा हुँदै आएको र पछिल्लो समय मादकपदार्थ सेवनपछि झगडा झन् बढेको थियो।

प्रहरी चौकी कमिरेचौरबाट खटिएको टोलीले ३८ वर्षीय श्रीमान् जागेश्वर पुनलाई घटनास्थलबाटै नियन्त्रणमा लिएको छ। घटनाको थप अनुसन्धान भइरहेको जिल्ला प्रहरी कार्यालय दाङले जनाएको छ।