एसईई नतिजा : यसपटक पनि विद्यार्थीको कठिन विषय बन्यो ‘गणित’

यस वर्षको माध्यमिक शिक्षा परीक्षा (एसईई) मा पनि गणित विषयमै सबैभन्दा धेरै परीक्षार्थी अनुत्तीर्ण भएका छन्। राष्ट्रिय परीक्षा बोर्डले शुक्रबार सार्वजनिक गरेको नतिजा अनुसार कुल १ लाख २८ हजार २१५ विद्यार्थी गणितमा अनुत्तीर्ण भएका छन्।
एसईईको नतिजाबाट प्रष्ट देखिएको छ कि गणित, अंग्रेजी, र विज्ञान विषयमा विद्यार्थीहरूलाई अझै चुनौतीपूर्ण अनुभव भइरहेको छ। गणितपछि सबैभन्दा धेरै ८० हजार ६७२ विद्यार्थी अंग्रेजीमा अनुत्तीर्ण भएका छन्। त्यसैगरी साइन्स एण्ड टेक्नोलोजी विषयमा ७९ हजार २७१ जनाले आवश्यक न्यूनतम ग्रेड प्राप्त गर्न सकेनन्।

अन्य विषयहरूको अवस्था पनि त्यति सुखद देखिएको छैन। नेपाली विषयमा ५४ हजार ७३५, सामाजिक अध्ययनमा ५३ हजार १८६, र अर्थशास्त्रमा ४२ हजार १५० परीक्षार्थी अनुत्तीर्ण भएका छन्।

त्यसैगरी ऐच्छिक विषयतर्फ हेर्दा, ऐच्छिक गणितमा पनि १८ हजार २२२ विद्यार्थीले असफलता भोगेका छन्। विशेषज्ञहरूका अनुसार गणित, अंग्रेजी, र विज्ञानजस्ता विषयमा विद्यार्थीहरूको कमजोरी शिक्षण प्रणाली, पाठ्यक्रमको जटिलता, र सिकाइमा आधारित मूल्यांकन प्रणालीको अभावसँग सम्बन्धित छ।

राष्ट्रिय परीक्षा बोर्डले विषयगत रूपमा गहिरो विश्लेषण गरेर शिक्षण र मूल्यांकन सुधारका उपायहरू अवलम्बन गर्नुपर्ने माग शिक्षाविद्हरूले गरेका छन्।