घोराहीमा लागूऔषधसहित चार युवा पक्राउ

दाङमा लागूऔषधसहित ४ जना पक्राउ
दाङ | घोराहीमा लागूऔषधसहित चार युवा पक्राउ परेका छन् । घोराही उपमहानगरपालिका-१९ दुईखोलीस्थित प्रहरी चौकी दुईखोलीबाट खटिएको प्रहरी टोलीले सोमबार जाँच गर्ने क्रममा उनीहरूलाई पक्राउ गरेको हो ।

घोराहीबाट रोल्पातर्फ जाँदै गरेको रा ४ प ४३५३ नं.को मोटरसाइकल र लु.प्र.०२-००१ प १३७६ नं.को स्कुटर खानतलासी गर्ने क्रममा त्यसमा सवार व्यक्तिहरूले लुकाइराखेको लागूऔषध ब्राउनसुगर फेला परेपछि पक्राउ गरिएको प्रहरी निरीक्षक सोम घर्ती मगरले बताए ।

प्रहरीले उनीहरूलाई बुधबार सार्वजनिक गरेको छ । पक्राउ पर्नेमा रोल्पा नगरपालिका-८ का वर्ष २६ का रविन घर्ती मगर, रोल्पा-२ का वर्ष २७ का समिप रोका मगर र वर्ष २५ का रिमन पुन मगर तथा रोल्पा-८ का वर्ष २५ का विकास के.सी. छन् ।

उनीहरूको साथबाट लागूऔषध ब्राउनसुगर ४ ग्राम ६२० मिलिग्राम र ट्रमाडोल हाइड्रोक्लोराइड क्याप्सुल ७४ पत्ता ७४० क्याप्सुल बरामद भएको प्रहरी निरीक्षक घर्ती मगरले बताए । उनीहरूलाई नियन्त्रणमा राखी थप अनुसन्धान गरिरहेको उनले जानकारी दिए ।