बयानका लागि रवि लामिछानेलाई भैरहवा ल्याइयो

बुटवलको सुप्रिम बचत तथा ऋण सहकारी संस्थामा बचतकर्ताको रकम अपचलन प्रकरणमा राष्ट्रिय स्वतन्त्र पार्टी (रास्वपा)का सभापति रवि लामिछानेलाई बयानका लागि रूपन्देही ल्याइएको छ ।

गोर्खा मिडिया नेटवर्कका तत्कालीन प्रबन्ध निर्देशक तथा पूर्वगृहमन्त्री लामिछानेलाई मंगलबार मध्याह्न पोखराबाट हवाइजहाजमार्फत् भैरहवा ल्याएको हो । बिहान पौने ८ बजे ल्याउने तयारी भए पनि खराब मौसमका कारण झण्डै पाँच घण्टा ढिलागरी रविलाई भैरहवा ल्याइएको हो ।

जिल्ला प्रहरी कार्यालय रूपन्देहीका प्रवक्ता डीएसपी लक्ष्मी खनालले बयानका लागि रविलाई रूपन्देही झिकाएको बताइन् । रविलाई विमानस्थलमा जिल्ला प्रहरी कार्यालय, रूपन्देहीमा लैजाने र त्यसपछि मंगलबार नै बयानको लागि जिल्ला सरकारी वकिलको पुर्‍याइने खनालको भनाइ छ ।

लामिछानेलाई भैरहवा ल्याउने भएपछि रास्वपा लुम्बिनी र सुप्रिम सहकारी पीडितहरूले छुट्टाछुट्टै प्रदर्शनको तयारी गरिरहेका छन् । दुवैले भैरहवाकेन्द्रित भएर प्रदर्शन गर्ने तयारी गरेपछि स्थानीय प्रशासनले जिल्ला अदालत र सरकारी वकिल कार्यालय क्षेत्रलाई निषेधित क्षेत्र घोषणाको तयारी गरिरहेको छ ।