प्रदेश सरकारलाई व्यवसायीहरूको माग : “लुम्बिनी भ्रमण वर्षको योजना लागू गर्न दबाव”

बुटवल | होटल तथा रेस्टुरेन्ट व्यवसायी संघ, लुम्बिनी प्रदेश समितिले लुम्बिनी भ्रमण वर्ष सन् २०२४/२०२५ सम्पन्न गर्ने गरी कार्ययोजना बनाउन लुम्बिनी प्रदेश सरकारलाई आग्रह गरेको छ ।

समितिले शनिबार बुटवलमा मुख्यमन्त्री चेतनारायण आचार्यलाई ज्ञापनपत्र बुझाउँदै पर्यटन क्षेत्रलाई लयमा फर्काउनको लागि भ्रमण वर्ष मनाउने गरी कार्ययोजना निर्माण गर्न आग्रह गरेको हो ।

संघका अध्यक्ष महेन्द्रप्रसाद श्रेष्ठले ७ बुँदे ज्ञापनपत्र बुझाउँदै प्रदेशभित्रका ऐतिहासिक, धार्मिक, पुरातात्विक, सांस्कृतिक सम्पदाहरूको पहिचान गरी त्यसलाई संरक्षण र प्रचारप्रसार गरी आवश्यक बजेट मिलाउन आग्रह गरेका हुन् ।

भैरहवास्थित विमानस्थल र बुटवलका सभाहल सञ्चालनमा ल्याउन, होटल व्यवसायीको क्षमता अभिवृद्धि गर्न बजेट विनियोजन गर्नसमेत माग गरिएको अध्यक्ष श्रेष्ठले बताए ।

पर्यटनसम्बन्धी नीति नियम निर्माण गर्दा संस्थाको सहभागिता, र सरकारले पर्यटनसँग सम्बन्धित कार्यालय वा निकायहरूमा समेत संस्थाको उपस्थितिको माग गरिएको छ।

ज्ञापनपत्र बुझ्दै मुख्यमन्त्री आचार्यले प्रदेश सरकारबाट होटल व्यवसायीसँग खेल्ने भूमिकामा कुनै कमी हुन नदिने प्रतिबद्धता व्यक्त गरे ।

मुख्यमन्त्री आचार्यले भने, ‘अब व्यवसायी निराशा हुनुपर्ने कारण छैन, विमानस्थल सञ्चालनमा आउँदै छ । त्यसपछि यस क्षेत्र चलायमान बन्छ ।’