संविधान दिवसका अवसरमा कपिलवस्तु कारागारबाट एक भारतीयसहित चार जना कैदीबन्दीलाई रिहा

ई–साझाकुरा, असोज ३

संविधान दिवसका अवसरमा कपिलवस्तु कारागारबाट एक भारतीयसहित चार जना कैदीबन्दीलाई रिहा गरिएको छ । असल चालचलन र ५० प्रतिशत कैद सजाय भुक्तान गरेका उनीहरुलाई शनिबार रिहा गरिएको हो ।

कारागार कार्यालयले कारागार ब्यवस्थापन बिभागमा पठाएको सिफारिश रहेको थियो । त्यसै आधारमा राष्ट्रपतिको आदेशानुसार संविधान दिवसमा जिल्लाका चार कैदीलाई रिहा गरिएको कारागारका जेलर राकेश पाण्डेले बताए ।

खरखजाना मुद्दाका भारतीय नागरिक एक जना, कर्तब्य ज्यान र कुटपिट मुद्दाका कपिलवस्तुका २ जना र सरकारी कागज किर्ते मुद्दाका बाराका एक जना कैदी रिहा भएका हुन् । संविधान दिवसमा नेपालमा २ सय ८९ जना कैदी रिहा भएका छन् । कपिलवस्तु कारागारमा दुई ब्लकमा अहिले ४ सय १५ जना कैदीबन्दी छन् ।