पङ्खाकाे तार जाेड्दा करेन्ट लागेर एक युवककाे मृत्यु

रूपन्देहीको गैंडहवामा करेन्ट लागेर एक युवकको मृत्यु भएको छ।

इलाका प्रहरी कार्यालय सूर्यपुराका अनुसार गैंडहवा गाउँपालिका वडा नं. ६ लोधपुरवाका २५ वर्षीय अनिल प्रसाद मौर्यको करेन्ट लागेर मृत्यु भएको हो।

आइतबार साँझ सवा ८ बजेतिर आफ्नै घरको सुत्ने कोठामा रहेको टेबल पंखाको तार जोड्ने क्रममा अचानक करेन्ट लागेर उनी गम्भीर घाइते भएका थिए।

करेन्ट लागेर गम्भीर घाइते भएका अनिललाई तत्काल उपचारको लागि भीम अस्पताल भैरहवा लगिएकोमा राति साढे नौ बजेतिर मृत्यु भएको इलाका प्रहरी कार्यालय सूर्यपुराका प्रहरी सहायक निरीक्षक कमल सुवेदीले जानकारी दिए।