भैरहवा विमानस्थल पूर्ण क्षमतामा चलाउने खाका ल्याउन प्रधानमन्त्रीको निर्देशन

काठमाडौं । प्रधानमन्त्री पुष्पकमल दाहाल प्रचण्डले पोखरा अन्तर्राष्ट्रिय विमानस्थल र गौतम बुद्ध अन्तर्राष्ट्रिय विमानस्थल भैरहवालाई पूर्ण क्षमतामा सञ्चालन गर्ने खाका ल्याउन निर्देशन दिएका छन् ।

शुक्रबार सिंहदरबारमा प्रधानमन्त्रीले दुईवटै अन्तर्राष्ट्रिय विमानस्थल पूर्ण क्षमतामा सञ्चालन गर्ने विकल्प र उपायहरूबारे छलफल गरेका हुन् ।

छलफलमा प्रधानमन्त्रीले केही सहुलियत दिएर र सरकारी सेवाको विस्तार गरेर विमानस्थल पूर्ण क्षमतामा सञ्चालनको खाका ल्याउन सम्बन्धित निकायलाई निर्देशन दिएका हुन् ।

प्रधानमन्त्री प्रचण्डले पर्यटन मन्त्रालय र नागरिक उड्डयन प्राधिकरणलाई गम्भीरतापूर्वक तयारी गरेर विमानस्थलहरू पूर्ण क्षमतामा सञ्चालनको ठोस प्रस्ताव ल्याउन निर्देशन दिए ।

उनले भने, ‘काठमाडौं एयरपोर्टमा एयर ट्राफिकको समस्या छ । यही बेला भैरहवा र पोखराबाट अन्तर्राष्ट्रिय उडान भर्ने गरी आवश्यक तयारी गर्नुपर्छ । वैदेशिक रोजगारीमा जाने नेपाली यात्रुहरू र अन्य यात्रुहरूलाई भैरहवा र पोखराबाटै उडान गराउने गरी तयारी गर्नुपर्छ । त्यसका लागि मेडिकल, श्रम स्वीकृति, अध्यागमन लगायतका सरकारी सेवा पोखरा र भैरहवामा व्यवस्थित गर्नुपर्छ । भिसा सेन्टरका लागि कूटनीतिक पहल सरकारले गर्छ ।’

छलफलमा प्रधानमन्त्रीले दुवै विमानस्थल राष्ट्रिय गौरवका आयोजना र देशका लागि रणनीतिक महत्वका परियोजना भएको जोड दिंदै पूर्ण क्षमतामा सञ्चालनका निम्ति सम्पूर्ण निकायले समन्वयकारी रूपमा समाधान खोज्नुपर्ने बताए ।

प्रधानमन्त्रीले भने, ‘पोखरा र भैरहवा एयरपोर्ट निर्माणमा राज्यको ठूलो लगानी भइसकेको छ । निजी क्षेत्रले समेत पर्यटन पूर्वाधारमा लगानी गरिसकेको छ । यस्तो परिस्थितिमा यी विमानस्थलहरू पूर्ण क्षमतामा सञ्चालन गर्नुको विकल्प छैन ।’