प्युठानमा ८० थान भरुवा बन्दुक बरामद

जिल्ला प्रहरी कार्यालय प्युठानले चालु आर्थिक वर्षमा ८० थान भरुवा बन्दुक बरामद गरेको छ । जिल्लाका विभिन्न स्थानबाट प्रहरीले भरुवा बन्दुक बरामद गरेको जिल्ला प्रहरी कार्यालय प्युठानका कार्यालय प्रमुख प्रहरी नायब उपरीक्षक नरहरी अधिकारीले जानकारी दिनुभयो ।

विभिन्न घटनामा प्रयोग भएका र लुकाईछिपाई राखेको अवस्थामा विभिन्न ठाउँबाट हतियार बरामद भएको प्रहरी प्रमुख अधिकारीले बताउनुभयो । “विगत ६ महिना यता विभिन्न स्थानबाट हातहतियार बरामद भएका हुन,” उहाँले भन्नुभयो, “चालु अवस्थामा रहेका र चालु अवस्थामा नरहेका हातहतियार छन ।” भरुवा बन्दुकसहित तीन थान पेस्तोल समेत प्रहरीले बरामद गरेको छ ।

इजाजत बिनाका हातहतियार बरामदले विभिन्न घटना न्यूनीकरण हुने प्रहरीले अपेक्षा गरेको छ । “जिल्लाका सिकार खेल्ने क्रममा विभिन्न घटना भएका छन्,” उहाँले भन्नुभयो, “ती हतियारहरु नियन्त्रण भएपछि घटनामा पनि कमी आउनेछन् ।” जिल्ला प्रहरी कार्यालयमा चालु आर्थिक वर्षमा तीन वटा अवैध हातहतियारसम्बन्धी मुद्दा दर्ता भएको छ ।