कपिलवस्तु फोटोग्राफर संघको १३औं साधारणसभा तथा चौथो अधिवेशन सम्पन्न

पवनराज पाण्डे | कपिलवस्तु फोटोग्राफर संघको १३औं वार्षिक साधारण सभा तथा चौथो अधिवेशन शनिबार वाणगंगा–४ स्थित पंजाबी तड्का पार्टी प्यालेसमा भव्यताका साथ सम्पन्न भएको छ।

कार्यक्रमका प्रमुख अतिथिमा कपिलवस्तुका सहायक प्रमुख जिल्ला अधिकारी पद्म लाल लामिछाने रहनुभएको थियो। त्यस्तै, बाणगंगा नगरपालिकाकी उपमेयर रिता कुमारी चौधरी, नेपाल फोटोग्राफर महासंघकी केन्द्रीय सदस्य कमला पन्थ, लुम्बिनी प्रदेश प्रहरी कार्यालयका उपप्रमुख सुजन ज्ञवाली, कपिलवस्तु उद्योग वाणिज्य संघका अध्यक्ष गणेश बहादुर क्षेत्री, कपिलवस्तु उद्योग व्यापार संघका अध्यक्ष खिमानन्द पौडेललगायत अतिथिहरूको उपस्थिति रहेको थियो।

उक्त अधिवेशनमा संघको वार्षिक प्रतिवेदन, आर्थिक प्रतिवेदन प्रस्तुत गर्नुका साथै आगामी वर्षका कार्ययोजना सार्वजनिक गरिएको थियो। संघलाई थप सबल र पेशागत हैसियतमा सक्षम बनाउन विभिन्न प्रस्ताव पारित गरिएको संघले जनाएको छ।

साथै, अधिवेशनले नयाँ कार्यसमिति चयन गरेको छ। नयाँ समितिको नेतृत्व प्रकाश चौधरीले गर्ने भएका छन्। समितिमा उपाध्यक्षमा कृष्ण पाण्डे, सचिवमा कृष्ण खनाल, सहसचिवमा विशाल बेलबासे, कोषाध्यक्षमा श्याम प्रसाद तथा सदस्यमा शिव गुलाम चौधरी, विष्णु पौडेल र कृष्ण सापकोटा कडेल निर्वाचित भएका छन्।

अतिथिहरूले संघले विगत १३ वर्षमा फोटोग्राफरहरूको पहिचान, अधिकार संरक्षण र पेशागत सम्मानमा पुर्‍याएको योगदानको उच्च मूल्याङ्कन गर्दै नयाँ नेतृत्वलाई सफल कार्यकालको शुभकामना दिएका थिए।

कार्यक्रमको सञ्चालन कर्ण तिवारी (कुमार) ले गर्नुभएको थियो।