कतै आजैदेखि र केही ठाउँमा भाेलिदेखि मतगणना

काठमाण्डाै

प्रतिनिधि सभा र प्रदेश सभा सदस्य चुनावअन्तर्गत आज आइतवार मतदान सम्पन्न भएको छ । दुई सय ७५ प्रतिनिधि सभा सदस्य र तीन सय ३० प्रदेश सभा सदस्य चयनका लागि बिहान ७ बजेदेखि बेलुका ५ बजेसम्म मतदान भएको हो । केही ठाउँमा भने विवादका कारण रोकिएको मतदान फेरि सुरु गर्दा बेलुका ७ बजेसम्म पनि मतदान भएको निर्वाचन आयोगले जनाएको छ ।

देशभर १० हजार आठ सय ९२ वटा मतदान स्थल र २२ हजार दुई सय २७ मतदान केन्द्र तोकिएको थियो । यो चुनावमा एक करोड ७९ लाख ८८ हजार पाँच सय ७० जना मतदाता थिए । चुनावका लागि मतपत्र र निर्वाचन सामग्रीसहित दुई लाख ४६ हजार नाै सय ६० कर्मचारी तथा नेपाली सेना, प्रहरी, सशस्त्र र म्यादी प्रहरी गरी झन्डै तीन लाख सुरक्षाकर्मी खटिएका थिए ।

गुल्मी, दोलखा, बाजुरा, सिरहा, नवलपरासी पूर्व लगायतका केही मतदान केन्द्रको मतदान भने रोकिएको छ । गुल्मीको कालीगण्डकी गाउँपालिकाको भगवती माध्यमिक विद्यालयको मतदान स्थगित भएको छ । छलफलपछि मतदानको मिति तोकिने निर्वाचन अधिकृतले बताएका छन् ।

अहिले देशका धेरैजसो ठाउँमा मतपेटिका सङ्कलनको काम सुरु भएको छ । सडक सञ्जाल पुगेका सबैजसो केन्द्रबाट गाडीमार्फत मतपेटिकालाई मतगणना हुने ठाउँसम्म पुर्‍याउने काम भइरहेको छ । मनाङ, मुस्ताङ, हुम्ला, डोल्पा लगायतका केही जिल्लाका विकट ठाउँमा हेलिकप्टरसमेत परिचालन गरिएको छ । प्रमुख निर्वाचन आयुक्त दिनेशकुमार थपलियाले आजै बेलुकादेखि मतगणना सुरु गर्ने तयारी रहेको जानकारी दिनुभयो । सहरी र सुगम जिल्लाको मतगणना भने आजै राति अबेरदेखि भए पनि सुरु गरिने आयोगले जनाएको छ ।

मतगणनास्थलमा मतपेटिका ल्याएपछि रुजु गर्ने र सर्वदलीय बैठक बसेपछि मतगणना सुरु हुनेछ । प्रमुख निर्वाचन आयुक्त थपलियाले यही मङ्सिर ८ गतेसम्म प्रत्यक्षतर्फको सबै परिणाम सार्वजनिक गरिसक्ने दाबी गर्नुभएको छ ।