कपिलवस्तु प्रहरीको सफलता, चार दिनमा २०७ जना फरार अभियुक्त पक्राउ

फरार अभियुक्त पक्राउको अभियान अपरेसन ‘फप’ अन्तर्गत चार दिनमा ती अभियुक्त पक्राउ गरिएको कपिलवस्तुका प्रहरी उपरीक्षक दानबहादुर कार्कीले बताए।

कार्कीका अनुसार आर्थिक वर्ष २०७७/७८ मा जम्मा १४१ जना फरार अभियुक्त पक्राउ परेका थिए। चार दिनको अवधिमा त्यसको डेढ गुणा फरार व्यक्ति पक्राउ परेको उनले बताए।

प्रहरीले २६ गते ८१, २७ गते ७४, २८ गते २२, २९ गते ३० जना पक्राउ गरेको हो। पक्राउ परेकामा कुटपिट, सवारी ज्यान, अंश, वन पैदावार, लागुऔषध लगायत मुद्दाका अभियुक्त छन्।

मुद्दा सानै भए पनि लामो समयदेखि पक्राउको प्राथमिकतामा नपरेका अभियुक्तलाई खोजी गर्ने सिलसिला चलाइएको प्रहरी उपरीक्षक कार्कीले बताए।

‘वर्षौंदेखि फरार रहे पनि प्रहरीले प्राथमिकता नदिँदा समाजमा खुलेआम हिँडिरहेका व्यक्ति छन्,’ उनले भने, ‘शान्ति सुरक्षा कायम गर्ने सिलसिलामा हामीले पक्राउ गरेका हौं, अपराध गरेपछि कानुनको दायरामा पुगिन्छ भन्ने सन्देश पनि हो।’