सन्तोष ढुङ्गानाका ‘दुई गजल’

• गजल १

फेरि खुशि फर्केर आउन समय लाग्दैन
कसले भन्छ मुस्कुराउँन समय लाग्दैन ।।

गाह्रो हुने भनेकै आँखाबाट निकाल्न हो
कसैलाई आँखामा सजाउन समय लाग्दैन ।।

पानि बादल बन्नलाई महिनौँ लाग्छ बरु
बादललाई पानि बनाउन समय लाग्दैन ।।

वेवास्ता खुब गरेका छौ घर छेवैको ढुङ्गो
पहिरो बनेर घर भत्काउन समय लाग्दैन ।।

छोराले बिर्सिएर बस्ला बर्षौँ आमालाई
आमालाई छोरो सम्झाउन समय लाग्दैन ।।

• गजल २

सपना बुन्दाबुन्दै हो अक्सर सकिएको
म यस्तै मान्छे हुँ हजुर घर सकिएको ।।

जो अगाडि पुग्दछ अरुलाई उभ्याँउदै
थाहा हुन्न उसकै यहाँ सफर सकिएको ।।

उडेरै बिलिन हुने त भुइँको धुलो रहेछ
कहिँ देख्नुभएको छ ? पत्थर सकिएको ।।

हुन त छिमेकिले साथ दिन्छु भनेको छ
देख्छु फेरि नदिकै कारण बगर सकिएको ।।

भरि भएर कसैको ज्यान लिनु भन्दा यहाँ
खालि सिसि बन्नु छ मलाई जहर सकिएको ।।

• सन्तोष ढुंगाना
  रुपन्देही