‘बनगाइ–मोतिपुर–कपिलधाम’ सडक निर्माण तीव्र गतिमा, ६ महिनामै सम्पन्न गर्ने निर्माण कम्पनीको लक्ष्य

कपिलवस्तु | वाणगंगा नगरपालिका–७ अन्तर्गत रहेको चर्चित पुरानो बनगाइ–डोहोटे सडक खण्ड अन्तर्गतको बनगाइ–मोतिपुर–कपिलधाम सडक निर्माण तीव्र गतिमा अगाडि बढिरहेको छ। बुटवलस्थित एन.भी.इन्द्रेणी जे.भी कम्पनीलाई सो सडक निर्माणको जिम्मा दिइएको हो।

कम्पनीका संचालक नारायण भुसालका अनुसार बनगाइको सिमानादेखि मोतिपुर हुँदै कपिलधामको दोस्रो पुलसम्मको २३०० मिटर लम्बाई र १३ मिटर चौडाइ भएको सडक एकैपटक दुबै तर्फ नालीसहित निर्माण कार्य भइरहेको छ। कुल ६ करोड ६५ लाख रुपैयाँ बजेटमा अघि बढाइएको यो परियोजना उच्च गुणस्तर र द्रुत गतिमा संचालन भइरहेको कम्पनीले जनाएको छ।

भुसालका अनुसार सडक निर्माणका लागि २ वर्षको अवधि तोकिए पनि कम्पनीले ६ महिनामै काम सम्पन्न गर्ने लक्ष्य राखेको छ।

यसअघि पनि सोही कम्पनीले कोइली (ख) को मोटरेबल पुल २ वर्षको समय सीमा हुँदाहुँदै पनि मात्र ९ महिनामै सम्पन्न गरी राष्ट्रिय स्तरमा प्रशंसा पाएको थियो। तीव्र र गुणस्तरीय निर्माण कार्यका कारण संचालक नारायण भुसाल देशभर परिचित ठेकेदारका रूपमा उभिन सफल भएका छन्।