फिफा विश्वकप : अन्तिम चार टोली, कोभन्दा को कम ?

 फिफा विश्वकप फुटबल २०२६ काे मैदानबाट ४४ वटा टोली घर फर्किसकेका छन् । अब बाँकी चार टाेली- फ्रान्स, अर्जेन्टिना, स्पेन र इङ्ग्ल्याण्ड छन् । अब यी टोलीमा लगातार जसले दुई जित निकाल्छ, त्यही च्याम्पियन बन्नेछ ।

यो पटक रोचक संयोग पनि परेको छ । फिफा वरीयताका शीर्ष चार टोली नै विश्वकपको सेमिफाइनलमा छन् । यी सबै टोलीले विगतमा पनि विश्वकपको ट्रफी उचाली सकेका छन् । त्यहीकारण सबै टोली उपाधिका बलिया दाबेदार पनि हुन् ।

फिफा वरीयताको शीर्ष स्थानमा रहेको फ्रान्सले तेस्रो स्थानको स्पेनसँग खेल्दैछ भने दोस्रो स्थानमा रहेको अर्जेन्टिना चौथो स्थानमा रहेको इङ्ग्ल्याण्डसँग भिड्दैछ । यी दुई सेमिफाइनमा हार्ने टिम उपाधि होडबाट बाहिरिनेछ । तेस्रो र चौथो स्थानका लागि पराजित दुई टोली आमनेसामने हुनेछन् ।

यी दुईको खेलको विजेता–विजेता उपाधिका लागि भिड्ने छन् । ‘कस्ले जित्ला ?’ यही जवाफ थाहा पाउन विश्वकपका दर्शक तीव्र प्रतीक्षामा छन् ।

कस्ता छन् टिमहरू ?
अर्जेन्टिना

साविक विजेता टोली लियोनल मेसीको भरमा खेलिरहेको छ । यो टोलीले फिफा वरीयतामा १५ स्थानभन्दा तल रहेका कमजोर टोलीसँग मात्रै सामना गरेको छ । सेमिफाइनलमा भने यो टोलीले हालसम्मकै बलियो टोली इङ्ग्ल्याण्डको सामना गर्दैछ ।

केप भर्डे र इजिप्टजस्ता कमजोर मानिएका टोलीसँग पनि अर्जेन्टिनाले सहज जित निकाल्न सकेन । तर, नाटकीय जित निकाल्न वा खेलको अन्तिममा गोल गर्ने कन्फिडेन्स यो टोलीमा छ ।

मेसीले उच्च लय देखाए र रक्षापङ्क्तिसँगको तालमेल मिले इङ्ग्ल्याण्डविरुद्ध अगाडि बढ्न सक्छ । मेस्सी नचलेको अवस्थामा यो टिमलाई गाह्रो छ । तर, अर्जेन्टिनाले अहिलेसम्म सेमिफाइनल हारेको रेकर्ड भने छैन ।

स्पेन

जारी विश्वकपका विगतका खेल हेर्दा स्पेन सबैभन्दा शक्तिशाली रक्षा पङ्क्ति भएको टोली हो । स्पेनले मजबुत र संगठित डिफेन्स प्रस्तुत गर्दै आएको छ ।

यो टोलीले बल नियन्त्रण राख्ने खुबी पनि देखाएको छ । यो टोलीको एट्याकिङ भने कमजोर मानिन्छ । गोल गर्ने अवसर धेरै बनाए पनि स्पेनको फिनिसिङमा समस्या देखिन्छ।

तथापि, लामिन यामाल, निको विलियम्स र मिकेल ओयारजाबाललाई रोक्न विपक्षी डिफेन्डरलाई सहज छैन ।

फ्रान्सजस्तो तीव्र काउन्टर-अट्याक गर्ने टोलीसँग स्पेनको डिफेन्सले काम गर्ला ? यसको जवाफ पाउन खेलको अन्तिम मिनेटसम्म कुर्नैपर्छ ।

इङ्ग्ल्याण्ड

सेमिफाइनलमा साबिक विजेता अर्जेन्टिना जस्तो हेभिवेट टोलीसँग भिड्न पर्ने अवस्था आउनु नै यो टोलीको ब्याडलक हो । सुखद कुरा अर्जेन्टिना पनि डरलाग्दो फर्ममा छैन ।

स्टार खेलाडीहरूसँगको समाना गर्दा यो टोली नर्भस हुन सक्छ । तथापि, यो टोलीसँग ह्यारि केन जस्ता अनुभवी फिनिसर छन् ।

जुड बेलिङ्घमले मिडफिल्डबाट खेल नियन्त्रण राख्दै निर्णायक गोल गर्ने क्षमता राख्छन् । डिफेन्समा पनि टोली कमजोर छैन र तथापि, अर्जेन्टिनाका लागि इङ्ग्ल्याण्ड सहज टोली होइन ।

फ्रान्स

फ्रान्सलाई यो पटक विश्वकपको सबैभन्दा बलियो दाबेदारका रुपमा नै हेरिएको छ । फ्रान्सले सबै खेल आफ्नो नियन्त्रणमा राख्दै सहज जित निकालेको छ ।

अट्याकमा किलियन एम्बाप्पे, माइकल ओलिसे, उस्मान डेम्बेले, डिजिरे डुए र ब्राड्ली बारकोलाजस्ता खेलाडी छन् । काउन्टर एट्याक पनि टोलीको राम्रो छ । तीव्र गतिको खेल यो टोलीको विशेषता हो ।

डिफेन्समा पनि टोली लयमै छ । विश्लेषकहरूले यही टोलीलाई विजेता हुने अनुमानमा छन् ।

-khabarhub