बबई नदी खतरा भन्दा माथि

गएराति देखि परेको अविरल वर्षाले बबई नदीमा पानीको सतह बढेको छ। आसपासका पहाडी जिल्लामा अत्यधिक वर्षा भएपछि बबईको चेपाङ जलमापन केन्द्रमा नदीले खतराको तह पार गरेको हो।

बबई नदीको चेपाङमा पानीको सतह ५ दशमलव ५० मिटरलाई चेतावनी र ६ दशमलव ८० मिटरलाई खतराको तह मानिन्छ। मंगलबार बिहानको मापन अनुसार चेपाङ जल मापन केन्द्रको सतह खतराको तह पार गरी ७ दशमलव ०९ मिटर पुगेको छ।

चेपाङ केन्द्रबाट पानीको बहाव गुलरियास्थित भादा पुलमा आइपुग्न केही घण्टा समय लाग्छ। भादापुल जलमापन केन्द्रमा ७ मिटर चेतावनी र ८ मिटर पानीको सतहलाई खतराको तह मानिन्छ।

जिल्ला विपद् व्यवस्थापन समिति बर्दियाले बबई नदीको चेपाङमा पानीको सतह खतराको तह पार गरेकोले बबई नदी तथा साना सहायक नदीहरूको तटीय क्षेत्रमा बसोबास गर्ने स्थानीयहरूलाई उच्च सतर्कता अपनाई सुरक्षित स्थानमा जान अनुरोध गरेको छ।