जंगली च्याउ खाएर बिरामी परेका दिदीभाइको मृत्यु 

रुकुमपूर्वको भूमे गाउँपालिका- ५ सेराबाङमा जंगली च्याउ खाएर बिरामी परेका दिदीभाइको मृत्यु भएको छ ।

मृत्यु हुनेमा ३ वर्षीय योजन विक र ७ वर्षीया भाग्यरेखा विक छन् । दुवै जना च्याउ खाएर गम्भीर बिरामी परेका थिए । रूकुमपूर्व प्रहरीले दिएको जानकारी अनुसार योजनको सल्यान जिल्ला अस्पतालमा मंगलवार दिउँसो र भाग्यरेखाको राप्ती स्वास्थ्य विज्ञान प्रतिष्ठान, दाङमा मंगलवार राति उपचारका क्रममा मृत्यु भएको हो ।

उनीहरूकी ९ वर्षीया दिदी आयुषा विकको अवस्था पनि गम्भीर बनेपछि सल्यानबाट दाङ रिफर गरिएको छ ।

त्यस्तै, ३५ वर्षीया आमा राजकुमारी विकको रुकुमपश्चिम जिल्ला अस्पतालमा उपचार भइरहेको छ । उनको अवस्था मध्यम रहेको प्रहरीले जनाएको छ ।

गत आइतबार एउटै परिवारका चार जनाले खाएको जङ्गली च्याउले विषाक्त असर देखाएपछि उनीहरू बिरामी परेका थिए ।