बुधवारसम्म धेरै ठाउँमा छिनछिनमा पानी परिरहने, धानखेतीका लागि उपयुक्त मौसम

पछिल्लो ६ घण्टामा देशभर अत्यधिक वर्षा मापन भएको छैन । जल तथा मौसम विज्ञान विभागको सञ्जालमा रहेका मापन केन्द्रमध्ये पछिल्लो ६ घण्टामा सबैभन्दा धेरै डडेल्धुराको गाँबाँधेमा ४७ दशमलव ८ मिलिमिटर वर्षा मापन भएको छ । यति पानी पर्नुलाई सामान्य मानिन्छ । अरू ठाउँमा योभन्दा कम वर्षा भएको छ । बाढी आउने गरी वर्षा मापन नभएको विभागअन्तर्गतकाे बाढी पूर्वानुमान महाशाखाले जनाएको छ ।

मौसम पूर्वानुमान महाशाखाका अनुसार आज राति कोशी, बागमती, गण्डकी, लुम्बिनी र सुदूरपश्चिम प्रदेशका एक/दुई ठाउँमा ठूलो पानी पर्ने सम्भावना छ । मनसुन सक्रिय रहेको अवस्था भएकोले कुनै ठाउँमा छोटो समयमा धेरै वर्षाको सम्भावना रहेकोले सचेत रहनुपर्ने मौसमविद्ले बताएका छन् ।

मौसम तथा पर्यावरण विज्ञ उज्जवल उपाध्यायका अनुसार मनसुनको न्यून चापीय रेखा पूर्वी र मध्य–भूभागमा आएर बसेकोले नियमित वर्षा गराउने सम्भावना रहन्छ । उहाँका अनुसार पर्सि बुधवारसम्म मौसम खुलेर घाम लाग्ने सम्भावना कम रहेको र छिनछिनमा वर्षा भइरहने भएकोले धान खेतीका लागि उपयुक्त मौसम हुनेछ ।

नेपालको मुख्य उत्पादन धानको खेतीका लागि धेरै ठाउँका किसान आकाशेपानीमा भर पर्ने गरेका छन् । ससाना मूल फुटेर वा सीधै खेतमा जम्मा भएको पानीबाट पनि रोपाइँ गर्ने गरिन्छ । अहिले पहाडी क्षेत्रमा धमाधाम रोपाइँ भइरहेको छ भने मध्यपहाडका केही ठाउँमा शुरू भएको छ । तराई मधेशमा भने बीउ छर्ने काम भइरहेको छ ।

यसपालि मनसुनको शुरूमै नियमित वर्षा भइरहेकोले धानखेतीका लागि मौसम अनुकूल बनेको छ । यो वर्षको मनसुनमा औसतभन्दा धेरै वर्षा हुने अनुमान रहेकोले धान रोपाइँ समयमा हुने आशा बढेको छ ।