तिलोत्तमामा कार र मोटरसाइकल ठोक्किँदा एक विद्यार्थीको मृत्यु

बुटवल । रुपन्देहीको तिलोत्तमा नगरपालिकामा सडक दुर्घटनामा एक जना विद्यार्थीको मृत्यु भएको छ । नयाँमिलस्थित जनसेवा चोकमा कार र मोटरसाइकल ठोक्किँदा गुल्मीको रुरु गाउँपालिका–३ घर भई हाल बुटवल–३, ट्राफिक चोक बस्दै आएका १९ वर्षीय रोशन परियारको निधन भएको हो ।

परियार तिलोत्तमा ५ स्थित शान्ति नमुना मावि कक्षा १२ मा अध्ययनरत थिए । दुर्घटनामा परि गम्भीर घाइते भएका परियारको उपचारका क्रममा निधन भएको जिल्ला प्रहरी कार्यालयका डिएसपी सुरज कार्कीले बताए ।

प्रहरी अनुसार बुटवलबाट जाँदै गरेको लु ५६ प १९६१ नम्बरको मोटरसाइकल र मुख्य हाइवेको पश्चिम लेनबाट पूर्वतर्फ बाटो काट्दै गरेको बा २० च १७५४ नम्बरको कार नयाँमिलस्थित जनसेवा क्लब अगाडी एक आपसमा ठोक्किएको हो ।

दुर्घटनापछि कार र चालकलाई नियन्त्रणमा लिएर छानबिन अगाडी बढाइएको प्रहरीले जनाएको छ ।