दाङका प्रमुख प्रशासकीय अधिकृतसहित २ जनाविरूद्ध भ्रष्टाचार मुद्दा दर्ता

दाङ गढवा गाउँपालिका तत्कालीन प्रमुख प्रशासकीय अधिकृत लालबहादुर योगीसहित २ जनाविरूद्ध भ्रष्टाचार मुद्दा दर्ता भएको छ।

अख्तियार दुरूपयोग अनुसन्धान आयोगले योगी र बज्र गुरू कन्सट्रक्सन कम्पनी प्रालि कुपण्डोल, ललितपुर र उक्त प्रालिका प्रबन्धक निर्देशक (एमडी) लक्षम्णकुमार रानाविरूद्ध आइतबार विशेष अदालतमा मुद्दा दर्ता गरेको हो।

उनीहरूले नदीजन्य पदार्थ उत्खननमा सम्झौता विपरीत बढी संकलन तथा उत्खनन् भएको परिमाणको राजस्व रकम हिनामिना गरेको अख्तियारको प्रवक्ता राजेन्द्रकुमार पौडेलले जानकारी दिए ।

उनीहरूले ९५ लाख ९८ हजार रूपैयाँ हिनामिना गरेको अख्तियारको आरोप छ। सोही अनुसार बिगो माग दाबी गरिएको अख्तियारका प्रवक्ता पौडेलले जानकारी दिए।