लुम्बिनीमा बजेटमाथि छलफल हुन सकेन, प्रदेशसभा बैठक स्थगित

कपिलवस्तु । लुम्बिनी प्रदेशसभामा बजेट छलफलका लागि बोलाइएको बैठक स्थगित भएको छ । आगामी आर्थिक वर्ष २०८०/०८१ को बजेटमाथि छलफल गर्न भोलि(आइतबार)का लागि बोलाइएको लुम्बिनी प्रदेशसभाको बैठक स्थगित भएको हो ।

भूगोल र जनसंख्याका आधारमा समान बजेट आउनु साटो मुख्यमन्त्री र अर्थमन्त्रीले आफूखुसी मनकेन्द्रित बजेट ल्याएको भन्दै सत्तापक्षबाटै विरोध भएपछि प्रदेशसभा बैठक सारिएको हो । सत्तापक्षीय धेरै सांसदले नै बजेट पूर्णरुपमा सच्चाएरमात्रै पारित गर्न सरकारसमक्ष माग गरेका छन् ।

लुम्बिनीमा मुख्यमन्त्री कांग्रेसका डिल्लीबहादुर चौधरी छन् भने अर्थमन्त्री माओवादी केन्द्रका धनबहादुर मास्के छन् । आइतबार बोलाइएको प्रदेशसभा बैठक असार १३ गते बुधबारका लागि सारिएको प्रदेशसभाका सचिव दुर्लभकुमार पुनमगरले जनाए ।

सत्ता पक्षमा रहेका माओवादी केन्द्रका प्रमुख सचेतक ईन्द्रजीत थारुले बजेट संशोधनका लागि सभा स्थगित हुनु भनेको सरकारको अपरिपक्वता र गौरजिम्मेवारीपूर्ण व्यवहार भएको बताए ।