भ्यानको ठक्करबाट मोटरसाइकल चालकको मृत्यु

रुपन्देही । रुपन्देहीको भैरहवामा सवारी दुर्घटनामा परी एक जनाको मृत्यु भएको छ । सिद्धार्थनगर नगरपालिका–४ हनुमान मन्दिरस्थित भित्री सडकखण्डमा पीकअप भ्यानको ठक्करबाट मोटरसाइकल चालकको मृत्यु भएको हो ।

जिल्ला ट्राफिक प्रहरी कार्यालयका अनुसार भे १ च ३२९० नम्बरको भ्यानले विपरीत दिशाबाट आउँदै गरेको लु १३ प ९२४६ नम्बरको मोटरसाइकललाई ठक्कर दिएको थियो ।

ठक्करबाट सख्त घाइते भएका सिद्धार्थनगर नगरपालिका–१ बस्ने २४ वर्षीय धिरजसिंह राजपुतको उपचारका क्रममा युनिभर्सल मेडिकल कलेज भैरहवामा मृत्यु भएको हो । दुर्घटनापछि भ्यान र चालकलाई नियन्त्रणमा लिई अनुसन्धान गरिरहेको जिल्ला प्रहरी कार्यालय रुपन्देहीले जनाएको छ ।