‘ए म त परदेशी’मा पोखियो परदेशी नेपालीको दसैँ पीडा

अर्घाखाँची । दसैँ नजिकिँदै गर्दा घर–आँगनमा चाडपर्वको रौनक छाउन थालेको छ । तर, रोजगारीका लागि वर्षौँदेखि विदेशमा रहेका नेपालीका लागि भने दसैँ खुसीभन्दा बढी घरपरिवारको सम्झना र पीडाको समय बन्ने गरेको छ । यही पीडा र भावनालाई समेटेर अर्घाखाँचीका परदेशी नेपालीले ‘ए म त परदेशी’ बोलको दसैँ गीत सार्वजनिक गरेका छन् ।

रोजगारीको सिलसिलामा हाल दुबईमा रहेका अर्घाखाँचीका विभिन्न स्थानका दाजुभाइ तथा दिदीबहिनीहरूको सहकार्यमा तयार भएको गीतमा परदेशी जीवनको दुःख, परिवारसँगको दूरी र चाडपर्वमा पनि घर फर्किन नसक्दाको पीडालाई मार्मिक रूपमा प्रस्तुत गरिएको छ ।

‘परदेशले जीवन खायो’ भन्ने भाव बोकेको गीतका शब्द र लयले विदेशमा रहेका नेपालीको वास्तविक जीवनसँग जोडिएको अनुभूति दिन्छ । दसैँमा परिवारसँगै बसेर टीका–जमरा लगाउने रहर हुँदाहुँदै पनि रोजगारीका कारण परदेशमै बस्नुपर्ने बाध्यतालाई गीत र भिडियोमार्फत भावुक ढंगले चित्रण गरिएको छ ।

पूर्णराज बेल्बासेको शब्द तथा लय रहेको गीतमा बिमल पौडेल, शान्ता रानी परियार र राजेन्द्र बरालको स्वर रहेको छ । गीतको म्युजिक भिडियोमा सुरेन्द्र न्यौपाने, सम्झना खनाल, मनिषा खनाल र बासुदेव बस्नेतको अभिनय रहेको छ भने अनु शर्मा र खिमप्रसाद शर्माले समेत भूमिका निर्वाह गरेका छन् ।

गीतको क्यामेरा तथा निर्देशन लालबहादुर ढेंगा, एरेन्ज महेन्द्र भण्डारी र भिडियो सम्पादन मनोहर भण्डारीले गरेका छन् ।

परदेशी जीवनको संघर्ष, दसैँमा घर फर्किन नसक्दाको छटपटी र आफ्ना परिवारको सम्झनालाई केन्द्रमा राखिएको गीतले स्वदेशमा रहेका परिवार र परदेशमा रहेका नेपालीबीचको भावनात्मक दूरीलाई उजागर गरेको छ ।

गीत सार्वजनिक भएसँगै परदेशमा रहेका नेपालीमाझ यसको चर्चा बढ्दै गएको छ । विशेषगरी गीतका शब्द र भावनासँग आफूहरूको जीवन जोडिएको भन्दै धेरै परदेशी नेपालीले टिकटक तथा सामाजिक सञ्जालमा गीत प्रयोग गरेर भिडियोसमेत बनाउन थालेका छन् ।

दसैँको खुसीसँगै परदेशीका आँखामा लुकेको आँसु र मनमा दबिएको घर फर्किने चाहनालाई आवाज दिएको ‘ए म त परदेशी’ अहिले परदेशी नेपालीको साझा भावनाको गीतजस्तै बन्दै गएको छ ।

https://www.youtube.com/watch?v=3UX7XU0yZFc