कालीगण्डकी करिडोरसहित गुल्मीका मुख्य तीन सडक पूर्ण रूपमा सुचारु

मनसुनपछि एक सातादेखि अवरुद्ध गुल्मीका मुख्य तीन सडक पूर्ण रूपमा सञ्चालनमा आएका छन्। कालीगण्डकी गाउँपालिका–२ राक्सेसहित चार ठाउँमा पहिरो खसेपछि कालीगण्डकी करिडोर अवरुद्ध भएको थियो। विभिन्न स्थानमा ठुला पहिरो खसेर लामो समयदेखि अवरुद्ध करिडोर बिहीबारदेखि सुचारु भएको प्रहरीले जनाएको छ।

कालीगण्डकी करिडोरसँगै मदन भण्डारी राजमार्ग र रिडी–रुद्रवेणी–वामी सडक पनि पूर्ण रूपमा सुचारु भएको जिल्ला प्रहरी कार्यालय गुल्मीका प्रमुख प्रहरी उपरीक्षक भीमकिरण बोगटीले जानकारी दिनुभयो।

मदन भण्डारी राजमार्गअन्तर्गत रुरुक्षेत्र गाउँपालिका–१ सालबिसौनामा पनि सडक अवरुद्ध भएको थियो। पाँच दिनदेखि एकतर्फी रूपमा सञ्चालनमा रहेको उक्त सडक अहिले पूर्ण रूपमा सञ्चालनमा आएको रुरुक्षेत्र गाउँपालिकाका अध्यक्ष यदु ज्ञवालीले जानकारी दिनुभयो।

रिडी–रुद्रवेणी–वामी सडकखण्डअन्तर्गत चन्द्रकोट गाउँपालिका–७ सिस्नेभीर र सत्यवती गाउँपालिका–६ उल्लीखोलामा बाढीले सडक कटान गरेको थियो। सिस्नेभीरको पहिरो हटाउनुका साथै उल्लीखोलामा खोलाको किनारबाट सवारीसाधन सञ्चालन गर्ने व्यवस्था मिलाइएको छ।

स्थानीय पालिका, सम्बन्धित सडक कार्यालय र निर्माणाधीन सडकको हकमा निर्माण व्यवसायीसँग समन्वय गरी सडक खुलाइएको हो।