अर्घाखाँचीमा मोटरसाइकल दुर्घटना : दुई जनाको मृत्यु, एक घाइते

अर्घाखाँची जिल्लाको पाणिनि गाउँपालिका–३ दुर्घाफाँटमा मोटरसाइकल दुर्घटनामा परेर दुई जनाको मृत्यु भएको छ भने एक जना घाइते भएका छन्।

जिल्ला प्रहरीका अनुसार कात्तिक १७ गते साँझ पौने ८ बजे निगालीबाट दुर्घाफाँटतर्फ जाँदै गरेको ना ३६ प ३५०९ नम्बरको मोटरसाइकल अनियन्त्रित भई सडकछेउमा दुर्घटना भएको हो।

दुर्घटनामा परेर पाणिनि गाउँपालिका–४ निगालीका १८ वर्षीय गौतम बिक र २४ वर्षीय सागर विकको मृत्यु भएको प्रहरीले जनाएको छ।

घटनापछि तीनै जनालाई स्थानीयले उद्धार गरी जिल्ला अस्पताल सन्धिखर्क पुर्‍याएका थिए। अस्पतालमा उपचारका क्रममा गौतम बिक र सागर विकको मृत्यु भएको हो ।

त्यसै दुर्घटनामा गम्भीर घाइते भएका २५ वर्षीय सन्तोष घर्तीको भने प्रारम्भिक उपचार गुल्मीको खर्ज्याङमा गरी थप उपचारका लागि पाल्पा पठाइएको प्रहरीले जनाएको छ।

उनको टाउकोमा चोट लागेको र अवस्था मध्यम रहेको छ। प्रारम्भिक अनुसन्धान अनुसार मोटरसाइकल तीव्र गतिमा रहेका कारण नियन्त्रण बाहिर गएर दुर्घटना भएको हुनसक्ने अनुमान प्रहरीले गरेको छ।