वडा अध्यक्ष जितेन्द्रले दिएको राजीनामा दुई वर्षपछि स्वीकृत

दाङको घोराही उपमहानगरपालिका-८ का वडा अध्यक्ष जितेन्द्र शाहले दिएको राजीनामा स्वीकृत भएको छ ।

नगर प्रमुख नरुलाल चौधरीले आफ्नो वडामा पर्याप्त बजेट नदिएको भन्दै उनले २०८० असार १२ गते पदबाट राजीनामा दिएका थिए ।

एमालेबाट निर्वाचित आफ्नै वडाध्यक्षको राजीनामा मेयर चौधरीले सोमबार दुई वर्षपछि स्वीकृत गरेका हुन ।

‘राजीनामा नगर प्रमुखले स्वीकृत गर्ने हो, त्यो असार मसान्तमा नै स्वीकृत भइसकेको थियो र आजको कार्यपालिकाले त्यसको अनुमोदन गरेको छ’, नगर प्रमुख चौधरीले भने ।

पार्टीको नीति विपरीत गएको भन्दै शाहलाई २०८१ माघमा पार्टीले समेत सदस्यता नरहने गरी निष्काशित गरेको थियो ।

मेयर चौधरीले शाहको ठाउँमा कार्यवाहक वडा अध्यक्ष भइ काम गर्नेगरी सोमबारबाट चूडामणि चौधरीलाई जिम्मेवारी दिएका छन् ।