यु-१६ क्रिकेट : भुटानविरुद्ध कलिवस्तुका रौनकको विस्फोटक शतकीय इनिङ

नेपालले एसीसी यू(१६ इस्ट जोन कपको फाइनल प्रवेशका लागि मलेसियासँग खेल्ने भएको छ । प्रतियोगिताको समूह ए मा रहेको नेपाल समूहविजेता हुँदै सेमिफाइनल खेल्ने भएको हो ।

मंगलबार भएको समूह चरणको अन्तिम खेलमा नेपालले भुटानलाई २९८ रनको फराकिलो अन्तरले हरायो । नेपालले समूह चरणमा चारमध्ये चारवटै खेल जितेको हो ।

मलेसिया भने समूह बी को उपविजेता हो । मलेसिया हङकङसँग मात्र पराजित भएको थियो । हङकङ भने समूह बी को विजेता बनेर समूह ए को उपविजेता सिंगापुरसँग खेल्ने छ ।

सेमिफाइनलका खेलहरू बिहीबार हुनेछन् भने फाइनल शनिबार हुनेछ । नेपाल यस प्रतियोगिताको साविक विजेता पनि हो ।

भुटानबिरुद्ध नेपालका लागि रौनक श्रीवास्तवले १३२ बलमा विस्फोटक १६८ रनको शतकीय इनिङ खेले । यसैगरी जोए थापा ६१ रन, शिवांस बजगाईँ ५४ रन र सुगम बुढाथोकीले ३५ रनको योगदान दिए ।