गुल्मीको मालिका गाउँपालिकामा कम गुणस्तर भएको मदिरा बिक्रीमा रोक

गुल्मी| गुल्मीको मालिका गाउँपालिकामा कम गुणस्तर भएका मदिरा बिक्रीमा पूर्णरुपमा रोक लगाइएको छ ।
मदिरा सेवनकै कारण पालिकाभित्र एक हप्ताको समयमा दुई जनाको मृत्यु भइसकेकाले कम गुणस्तर भएका सोफी ब्राण्डको (टुङकुला) मदिरालाई पूर्ण रुपमा रोक लगाइएको गाउँपालिकाले जनाएको छ ।

गाउँपालिकाका कार्यवाहक अध्यक्ष उपेन्द्र अर्यालका अनुसार पालिकाभित्रका व्यवसायीहरुसँग रहेको उक्त ब्राण्डको मदिरा एक हप्ताभित्रमा व्यवस्थापन गर्नुपर्नेछ । मदिरा बिक्रीका लागि पालिकाभित्रका अनुमति प्राप्त व्यवसायीहरुले साँझ ५ः३० देखि ८ बजेसम्म मात्र बिक्री गर्नुपर्ने, नाबालक, महिला तथादीर्घ रोगीहरुलाई बिक्रीका लागि रोक लगाइएको उहाँले बताउनुभयो ।

पालिकाभित्र कम गुणस्तरको मदिरा बिक्रीमा रोक लगाउनका लागि अनुगमनलाई कडाइ गर्ने, पालिकाले गरेको निर्णयलाई अवज्ञा गरेमा व्यवसायी तथा ढुवानीकर्तालाई पहिलो पटक पाँच हजारसम्म जरिवाना गर्ने अर्यालले बताउनुभयो ।

अनुगमनलाई प्रभावकारी बनाउनका लागि प्रहरी प्रशासनको सहयोग लिने जरिवानाबाट उठेको २५ प्रतिशत रकम सुरक्षा कर्मीलाई प्रदान गर्ने व्यवस्था गरेको उहाँले बताउनुभयो । प्राप्त २५ प्रतिशत रकम सुरक्षाकर्मीले सवारी साधन मर्मतमा खर्च गर्नुपर्ने गरी व्यवस्था गरिएको गाउँपालिकाले जनाएको छ ।

गाउँपालिकाले गरेको निर्णय जिल्ला प्रशासन कार्यालय, जिल्ला प्रहरी कार्यालयलाई जानकारी गराइएको पालिकाले जनाएको छ ।