५ महिनापछि बसेको बैठक पाँच मिनेट मै स्थगित

साझाकुरा ।
लुम्बिनी प्रदेश सभाको शुक्रवारदेखि शुरू भएको हिउँदे अधिवेशनको पहिलो बैठक पाँच मिनेट मात्र बसेर स्थगित भएको छ ।

बैठक संसदीय दलको तर्फबाट तेस्रो अधिवेशनको शुभकामना दिने विषय कार्यसूचीमा नपरेपछि पाँच महिनापछि बसेको तेस्रो अधिवेशनको पहिलो बैठक ५ मिनेट १७ सेकेन्ड मात्र बसेर स्थगित भएको हो । ​

कार्य व्यवस्था परामर्श समितिको बैठकमा संसदीय दलको तर्फबाट बोल्ने कार्यक्रमपछि राख्ने सहमति भएपछि पहिलो बैठकको समय छोटो भएको प्रदेश सभा सचिव दुर्लभकुमार पुन मगरले जानकारी दिए ।

दोस्रो बैठक शनिवार दिउँसो २ बजे बस्नेछ । दोस्रो बैठकलाई प्रधानमन्त्री पुष्पकमल दाहाल प्रचण्डले सम्बोधन गर्ने कार्यक्रम छ ।

बैठकमा सभामुख तुलाराम घर्ती मगरले प्रदेश प्रमुखले अधिवेशन आह्वानसम्बन्धी पठाएको पत्र र मन्त्रिपरिषद्‌मा कार्य विभाजन हेरफेरसम्बन्धी पत्र पढेर सुनाएका छन् ।

दोस्रो अधिवेशनबाट पारित भई प्रदेश प्रमुखबाट प्रमाणीकरण भएका विधेयकहरूको बारेमा पत्रहरू प्राप्त भएको र त्यसबारे सभामा जानकारी गराएका छन् ।