कञ्चन ५ गरगरेमा सुनचाँदी पसलबाट गहनासहितको सेफ चोरी

रूपन्देही । रुपन्देहीमा एक सुनचाँदी पसलमा चोरी भएको छ । कन्चन गाउँपालिका– ५ गरगरेमा रहेको न्यू अर्घाखाँची सुनचाँदी पसलबाट साढे ८ लाख मुल्यका तयारी सुनका गहना चोरी भएको हो ।

पसलबाट सुनचाँदीका गरगहना राखिएको सेफ नै चोरी भएको प्रहरीले जनाएको छ । इलाका प्रहरी कार्यालय सालझण्डीका अनुसार शनिबार राति पसलको सटर फोरेर सेफसहित चोरी भएको हो । पसलधनी लालबहादुर विश्वकर्माका अनुसार सेफमा ८ तोला सुन र ६० हजार बराबरको चाँदीका गरगहना रहेको थियो ।

कञ्चन गाउँपालिकाले बजार क्षेत्रमा सीसीटीभी राखेको भए पनि कुनै पनि चालू अवस्थामा नदेखिएको इप्रका सालझण्डीका प्रहरी निरीक्षक जगतनाथ मरासिनीले बताए ।

उनका अनुसार चोरी भएको ठाउँदेखि चार सय मिटर पश्चिम कपिलवस्तु तर्फ आउने बाटोको कुलामा चाँदीको पाउजु र गहना राख्ने ट्रे फेला परेको छ । प्रहरीले सर्च अभियान जारी राखेको जनाएको छ ।

113