मोटरसाइकल दुर्घटना हुँदा नदीमा खसेका दुई युवाको शव फेला
ई–साझाकुरा, साउन ३२
मोटरसाइकल दुर्घटनामा परेर नदीमा खसेका दुई युवाको शव फेला परेको छ।
जिल्लाको गढवा गाउँपालिका वडा नं. ७ चन्दनपुर निवासी २६ वर्षीय सुरजनारायण चौधरी र सोही ठाउँका २७ वर्षीय मनोज चौधरी गएराति भएको मोटरसाइकल दुर्घटनापछि सानो राप्ती नदीमा खसेका थिए।
मोटरसाइकल चालक सुरजनारायण चौधरीको शव गएराति नै घटनास्थल नजिकै फेला परेको थियो। पछाडि सवार मनोज चौधरीको शव भने आइतबार विहान साढे ११ बजेतिर राप्ती नदीको बीचमा फेला परेको थियो। बेपत्ता चौधरीलाई खोज्न प्रहरी प्रशासन र स्थानीय सर्वसाधारण पनि खटिएका थिए। गएराति करिव पौने ११ बजेतिर लु ५७ प ११०० नम्बरको मोटरसाइकलमा लमहीबाट गढवातर्फ जाँदै गरका उनीहरु बलरामपुरस्थित सानो राप्ती नदीको पुलको बारमा ठोक्किएर नदीमा खसेको अनुमान प्रहरीले गरेको छ।
एक प्रहरी अधिकारीले मादक पदार्थ सेवन गरी सवारी चलाएका कारण उक्त दुर्घटना भएको जानकारी दिए। शवहरु पोष्ट मार्टमको लागि लमही अस्पतालमा राखिएको छ।
लुम्बिनी प्रदेश सबै
प्रतिक्रिया