काभा पुरुष भलिबलमा नेपालको लगातार चौथो हार

नेपाली पुरुष भलिबल टोलीले काभा पुरुष भलिबल च्याम्पियनसिपमा लगातार चौथो हार बेहोरेको छ।

पाकिस्तानको इस्लामाबादमा आइतबार भएको खेलमा नेपाल बंगलादेशसँग ३–२ को सेटमा पराजित भएको हो। दुई पटक अग्रता लिए पनि त्यसलाई जोगाउन नसक्दा नेपाल निर्णायक पाँचौं सेटमा चुकेको हो।

बंगलादेशले नेपाललाई १८–२५, २५–१९, २१–२५, २५–२३ र १५–११ को सेटमा हरायो। यो प्रतियोगितामा नेपाल पाँचौं सेटसम्म पुगेर पराजित भएको तेस्रो पटक हो।

यसअघि नेपाल पाकिस्तानसँग ३–० तथा श्रीलंका र काजकस्तानसँग ३–२ को सेटमा पराजित भएको थियो।

काभा पुरुष भलिबल च्याम्पियनसिपमा नेपालसहित पाकिस्तान, श्रीलंका, काजकस्तान, बंगलादेश र उज्वेकिस्तान गरी ६ टोली सहभागी छन्। लिग चरणमा सबै टोलीले एकअर्कासँग प्रतिस्पर्धा गर्नेछन् भने शीर्ष चार टोली सेमिफाइनलमा प्रवेश गर्नेछन्।

नेपालले राउन्ड रोबिन चरणको अन्तिम खेल सोमबार उज्वेकिस्तानविरुद्ध खेल्नेछ।