कपिलवस्तुमा २५७०औँ बुद्ध जयन्तीमा प्रभातफेरी 

कपिलवस्तुमा २५७०औँ बुद्ध जयन्तीका अवसरमा प्रभातफेरी कार्यक्रम सम्पन्न गरिएको छ । कार्यक्रम कपिलवस्तु नगरपालिका कार्यालयबाट सुरु भई जिल्ला प्रशासन कार्यालय अगाडिको चोक, गौढी चोक हुँदै मङ्गल विहारमा पुगेर पूजाआर्चनासहित सम्पन्न भएको हो ।

सहभागीहरूले बुद्धका उपदेशसम्बन्धी नारा लगाउँदै शान्ति र सहिष्णुताको सन्देश फैलाएका थिए । त्यस्तै लुम्बिनीबाट आएका पर्यटकलाई कपिलवस्तु नगरपालिका अगाडि खादा लगाएर स्वागत गरिएको लुम्बिनी विकास कोषका पूर्व कार्यकारी सदस्य राजेश ज्ञावालीले बताउनुभयो ।

कपिलवस्तु नगरपालिकाका नगर प्रमुख सुदीप पौडेलले बुद्धका शिक्षालाई व्यवहारमा उतार्दै समाजमा शान्ति र सद्भाव कायम गर्न सबैलाई आह्वान गर्नुभयो ।

शान्ति, अहिंसा र सद्भावको सन्देश प्रवाह गर्ने उद्देश्यले आयोजना गरिएको कार्यक्रममा स्थानीय बासिन्दा, सुरक्षाकर्मी, विभिन्न सङ्घसंस्था तथा सरोकारवालाको उल्लेखनीय सहभागिता रहेको थियो ।

कार्यक्रम कपिलवस्तु नगरपालिकाको सहयोगमा २५७०औँ बुद्ध जयन्ती मूल आयोजक समिति–२०८३ कपिलवस्तुले आयोजना गरेको हो । बुद्ध जयन्तीको अवसरमा चित्रकला तथा वक्तृत्वकला प्रतियोगिता समेत गरिएको थियो ।