अर्थतन्त्र गम्भीर चुनौतीको अवस्थामा रहेको राष्ट्रपति भण्डारीको भनाई

बुटवल । राष्ट्रपति विद्यादेवी भण्डारीले मुलुकको अर्थतन्त्रले गम्भीर चुनौतीको सामना गरिरहेको बताएकी छन् ।देशको व्यापार घाटा बढिरहेको, आयात नियन्त्रण नभै झनै बिस्तार भएको र मुद्रा सन्चितीमा अभूतपुर्व चाप परेको भन्दै अर्थतन्त्र गम्भीर चुनौतीको अवस्थामा रहेको बताइन्।

बुटवलमा रुपन्देही उद्योग संघ, लुम्बिनी उद्योग परिसंघ र नेपाल उद्योग परिसंघको संयुक्त आयोजनामा बिहीबारदेखि बुटवलमा सुरु भएको राष्ट्रिय औद्योगिक प्रदर्शनी, कृषि प्रविधि एवं पर्यटन महोत्सवको उदघाटन गर्दै राष्ट्रपति भण्डारीले मुलुकको अर्थतन्त्रलाई लयमा फर्काउन आयात प्रतिष्थापन गर्ने खालका वन पैदावार र जडिबुटीजन्य उद्योग स्थापनामा जोड दिनुपर्ने र निर्यात बढाउनुपर्ने बताइन्।
राष्ट्रपति भण्डारीले खेतीयोग्य जमिन बाँझो नराख्नका लागि युवा जनशक्तिलाई कृषि क्षेत्रमा लगाउनुपर्ने र कृषिजन्य उत्पादनलाई बढाउन सके व्यापार घाटा कम गर्न सकिने बताइन्।

राष्ट्रपति भण्डारीले भैरहवामा निर्माण सम्पन्न भएको गौतमबुद्ध अन्तर्राष्ट्रिय विमानस्थललाई व्यवस्थित रुपमा सञ्चालन गर्न सरकारको ध्यानाकर्षण गराइन् । “विमानस्थललाई व्यवस्थित रुपले सञ्चालन गर्न सके यस क्षेत्रको औद्योगिक विकास सँगै पर्यटन क्षेत्रको विकासले पनि गति लिन्छ, यसका लागि सम्बन्धित निकायले तदारुकता देखाउन जरुरी छ” उनले भनिन् ।

राष्ट्रपति भण्डारीले राज्यको ढुकुटीमा आफ्नो परिश्रमबाट कर तिर्ने उद्यमी र किसानले सेवा प्राप्त गरुन् भन्नेतर्फ ध्यान दिन सम्बन्धित निकायको ध्यानाकर्षण समेत गराइन्। उनले बुटवलमा आयोजित राष्ट्रिय औद्योगिक प्रदर्शनीले मुलुकको समृद्धि र जनताको सुखको अपेक्षालाई प्रतिनिधित्व गर्ने समेत बताइन्।

कार्यक्रममा गृहमन्त्री एवं नेपाली कांग्रेसका केन्द्रिय सदस्य बालकृष्ण खाँणले अब बन्ने नयाँ सरकारले देशको आर्थिक विकास केन्द्रीत हुनुपर्ने बताएका छन् । कोरोना महामारी जस्ता निकै ठूला महामारीका कारणले नेपालको आर्थिक अवस्था बिग्रिएको बताउँदै नवनिर्वार्चित सांसदहरुको सरकारको पहिलो प्राथमिकता देशको आर्थिक विकासमा केन्द्रित हुनुपर्ने बताएका हुन्।

कार्यक्रममा बोल्दै बुटवल उपमहानगरपालिका प्रमुख खेलराज पाण्डेयले नेपाली सेनाको मातहतमा रहेको उक्त जग्गा प्राप्तीको लागि स्व गिरिजाप्रसाद कोईराला लगायतले निकै योगदान गरेको बताउँदै उनकै योगदानले गर्दा स्थायी संरचनामा मेला गर्न पाईएको बताए।

कार्यक्रममा लुम्बिनी उद्योग परिसंघ अध्यक्ष एजाज आलामले देशको आर्थिक स्थीति परिवर्तन हुनेगरि कामहरु नयाँ सरकारले गर्नुपर्ने बताए।

कार्यक्रममा बोल्दै रुपन्देही उद्योग संघका अध्यक्ष माधव प्रसाद पौडेलले मेलाले स्वदेशी उत्पादनको प्रवद्र्धन गर्नेगरी स्टल निर्माण गरेको बताउँदै यसले अर्थतन्त्र सुधारमा केही काम गर्ने बताए ।