बेल्जियमले रसियालाई हरायो, दोहोरो गोल गरेका लुकाकुले आफ्नो प्रदर्शन समर्पण गरे इरिक्सनलाई

एजेन्सी

यूईएफए युरो कप अन्तर्गत गएराति सम्पन्न खेलमा बेल्जियमले रसियामाथि जित निकालेको छ। क्रेस्टोभेस्की स्टेडियममा सम्पन्न समूह ‘बी’ को खेलमा बेल्जियमले रसियामाथि ३-० को सहज जित निकालेको हो।

बेल्जियमले खेलको १० औं मिनेटमै रोमेलु लुकाकुको गोलमा खेलमा अग्रता बनाएको थियो। त्यस्तै थोमस मेउनइरले ३४ औं मिनेटमा गोल थप्दा पहिलो हाफमै बेल्जियम दुई गोलले अघि रह्यो। त्यस्तै दोस्रो हाफमा लुकाकुले नै गोल थपे। उनले खेलको ८८ औं मिनेटमा मेउनइरको पासमा गोल गर्दा रसियाले गोल फर्काउन सकेन।

पहिलो गोलगरेपछि लुकाकुले फिनल्याण्डविरुद्धको खेलमा मैदानमा ढलेका उनका इन्टर मिलानका टिममेट क्रिस्टियन एरिक्सनलाई समर्पित गर्दै क्यामरा अघि गएर ‘क्रिस क्रिस आई लभ यू’ भन्दै चिच्याएका थिए।

खेलपछि प्रतिकृया दिँदै लुकाकुले भने: म धेरै डराएको थिएँ। हामीले एकसाथ धेरै समय बिताएका थियौं। खेल खेल्न पनि कठिन भइरहेको थियो। आशा छ। उ स्वस्थ छ र म आजको प्रदर्शन उसलाई डेडिकेट गर्न चाहन्छु।

जितसँगै ३ अंकसहित बेल्जियम समूह ‘बी’ को शीर्षस्थानमा उक्लिएको छ। त्यस्तै गएराति नै डेनमार्कमाथि जित निकाल्दै समान ३ अंक जोडेको फिनल्याण्ड तालिकाको दोस्रो स्थानमा छ। त्यस्तै समूहमा रसिया र डेनमार्कले प्रतियोगिताको पहिलो खेलमा पराजय ब्यहोर्दै अंकविहिन छन्।