एमालेको प्रदर्शनलाई लक्षित गर्दै देशभर प्रहरी ‘स्ट्याण्डबाई’

काठमाडौं । नेकपा एमालेले गर्ने प्रदर्शनलाई दृष्टिगत गर्दै नेपाल प्रहरीले देशभरका प्रहरी कर्मचारीलाई बिहान ८ बजेदेखि ‘स्ट्याण्डबाई ड्युटी’ मा राखेको छ । सशस्त्र प्रहरी बलको गस्ती पनि बढाइने भएको छ ।

एमाले अध्यक्ष तथा पूर्वप्रधानमन्त्री केपी शर्मा ओली र नेपाली कांग्रेसका नेता एवं पूर्वगृहमन्त्री रमेश लेखक पक्राउको विरोधमा एमालेले शनिबार बिहानैदेखि प्रदर्शन गर्दै आएको छ । सरकारले जेनजी आन्दोलन जाँचबुझ आयोगको प्रतिवेदन कार्यान्वयनका क्रममा शनिबार बिहान ओली र लेखकलाई भक्तपुरबाट पक्राउ गरेको थियो ।

एमालेले पूर्वनिर्धारित कार्यक्रमअनुसार आज आइतबार देशभरका जिल्ला प्रशासन कार्यालयमा ज्ञापनपत्र बुझाउने कार्यक्रम राखेको छ । यही सन्दर्भमा निषेधित क्षेत्र, संवेदनशील भवन तथा विशिष्ट व्यक्तिहरूको सुरक्षालाई ध्यानमा राख्दै केन्द्रीय प्रहरीले देशभरका युनिटलाई शनिबार राति नै सतर्क रहन निर्देशन दिएको हो ।

नेपाल प्रहरीका केन्द्रीय प्रवक्ता डीआईजी अबिनारायण काफ्लेले सुरक्षा व्यवस्थापन प्रहरीको नियमित जिम्मेवारी भएकाले त्यसका लागि छुट्टै आदेश आवश्यक नपर्ने बताए । यद्यपि, परिस्थितिको गम्भीरता हेरेर सम्बन्धित कमाण्डरको आदेशबमोजिम आवश्यक परिचालन गरिने उनले जानकारी दिए ।

उनका अनुसार देशभर अत्यावश्यक अवस्थाबाहेक प्रहरी कर्मचारीलाई बिदा नछाड्न र सबै गण, गुल्म तथा तालिम केन्द्रको जनशक्ति पनि परिचालनका लागि तयारी अवस्थामा राख्न भनिएको छ ।

काठमाडौंमा भने निषेधित क्षेत्र तथा महत्त्वपूर्ण स्थानहरूमा बिहान ८ बजेदेखि थप मद्दत टोलीसहित प्रहरी परिचालन गरिने भएको छ । प्रहरी स्रोतका अनुसार भिड नियन्त्रणका लागि आवश्यक सबै सुरक्षा बन्दोबस्ती तयारी अवस्थामा राखिएको छ ।