तलब–भत्ता नलिने रास्वपा सांसद सुधन गुरुङको घोषणा

राष्ट्रिय स्वतन्त्र पार्टी (रास्वपा)का तर्फबाट प्रत्यक्ष निर्वाचित सांसद सुधन गुरुङले आफूले सरकारी तलब–भत्ता तथा सेवा सुविधा नलिने बताएका छन् । रास्वपाका नवनिर्वाचित सांसदका निम्ति ललितपुरको ग्वार्कोस्थित एक होटेलमा आयोजित अभिमुखीकरण कार्यक्रममा सहभागी हुने क्रममा मंगलबार (चैत ३) उनले यस्तो बताएका हुन् ।

“तलब–भत्ता, सुविधा केही लिन्नँ । सरकारी गाडी पनि चढ्दिनँ,” उनले भने, “आफ्नै गाडी छ, त्यही चढ्छु । सक्षम छौँ, किन लिनुपर्‍यो ?”

सांसदलाई सरकारी तलब–भत्ता तथा सेवा सुविधा हुन्छ । सांसदलाई गाडी सुविधा हुँदैन । संसदीय दलको नेता, प्रमुख सचेतक, सचेतक तथा मन्त्री बनेको अवस्थामा भने गाडी उपलब्ध गराइन्छ ।