तेस्रो पटक सकारात्मक सर्किट लागेपछि आजको शेयर कारोबार रोकियो

तेस्रो पटक सकारात्मक सर्किट लागेसँगै आजको शेयर कारोबार रोकिएको छ । चुनावपछि खुलेको पहिलो कारोबार दिन शेयर बजार परिसूचक नेप्सेमा तेस्रो पटक सकारात्मक सर्किट लागेको हो ।

बिहीवार भएकाे चुनावमा रास्वपाले दुईतिहाइ नजिक मत पाएपछि स्थिर सरकारकाे आशामा लगानीकर्ता आकर्षित भएका हुन् ।

आज शेयर बजार खुलेको १ मिनेटमै ४ प्रतिशतले बढेर सर्किट ब्रेक लागेको थियो । २० मिनेट बजार बन्द भएर खुलेको १ मिनेटमै बजार थप १ प्रतिशतले बढ्याे । यो अवधिमा कुल ५ प्रतिशतले बढेपछि बजारमा दोस्रो सर्किट ब्रेक लागेको हो । ४० मिनेट रोकिएर खुलेको शेयर बजार थप १ प्रतिशत बढेर कुल ६ प्रतिशतको वृद्धिपछि सर्किट लागेर आजको कारोबार नै रोकिएको हाे ।

नेप्से आज १६२ दशमलव ९३ अङ्कले बढेर २ हजार ८७५ दशमलव ४३ विन्दुमा पुगेकाे छ । आज सबै समूहकाे शेयर बढेकाेमा व्यापार समूहकाे शेयर सबैभन्दा धेरै ७ दशमलव ७३ प्रतिशतले उकालाे लागेकाे छ ।

आज कर्पाेरेट विकास बैंक, शिवश्री हाइड्राेपावर कम्पनीकाे शेयर १० प्रतिशतले बढेकाे छ । बजार उच्च अङ्कले बढेकाे दिन आज रिलाइन्स स्पिनिङ मिल्स कम्पनीकाे १ दशमलव ४९ प्रतिशतले घटेकाे छ । आज याे कम्पनीकाे मात्रै शेयर घटेकाे हाे ।