दाङमा पार्टीको झण्डा जलाएको विरोधमा नेकपा (एमाले) को पोखरामा प्रदर्शन !

दाङमा पार्टीको झण्डा जलाएको विरोधमा नेकपा (एमाले) ले पोखरामा प्रदर्शन गरेको छ । शुक्रबार एमाले कार्यकर्ताहरूले पोखरामा राँके जुलुससहित प्रदर्शन गरेका हुन् ।

त्यसक्रममा उनीहरूले नाराबाजीसमेत गरेका छन् । एमालेको युथ भोलेन्टियर फोर्सको अगुवाइमा भएको प्रदर्शनमा झन्डा जलाउनेलाई कारबाही माग गरिएको छ ।

यता, काठमाडौंमा पनि एमाले कार्यकर्ताहरूले प्रदर्शन गरेका छन् । उनीहरूले शुक्रबार साँझ काठमाडौंको भृकुटीमण्डपमा प्रदर्शन गरेका हुन् ।

प्रहरीले झण्डा जलाएको आरोपमा एकजनालाई पक्राउ गरिसकेको जानकारी दिएको छ । घटनाका सम्बन्धमा अनुसन्धान भइरहेको र अन्य संलग्नहरूको खोजी भइरहेको प्रहरीले जानकारी दिएको छ ।