राष्ट्रिय सभा निर्वाचन: उम्मेदवारविरुद्धको उजुरीमाथि आज र भोली छानबिन हुने

आगामी माघ ११ गते हुने राष्ट्रिय सभाका १८ सदस्यको निर्वाचनका लागि बुधबार उम्मेदवारी दर्ता भएकोमा आज र भोली उम्मेदवारविरुद्ध परेका उजुरी बारे छानबिन हुने कार्यतालिका रहेको छ ।

बुधबार भएको उम्मेदवारी दर्तामा सात प्रदेशका विभिन्न क्लस्टरमा ४४ जनाले उम्मेदवारी दिएका थिए । जस मध्ये लुम्बिनी प्रदेशबाट नेपाली काँग्रेसबाट उम्मेदवार बनेका वासुदेव घिमिरेविरुद्ध उजुरी परेको छ । अपाङ्ग कोटाबाट उम्मेदवार बनेका जंगलीविरुद्ध उजुरी परेको हो । उनकै पदका प्रत्याशी नेपाली कम्युनिस्ट पार्टीका सजन विकले अपाङ्ग नभई नक्कली परिचय पत्र बनाइएको भन्दै उजुरी गरेका हुन् ।

आयोगले उम्मेदवारीविरुद्ध विहिबार बिहान १० बजेदेखि ४ बजेसम्म उम्मेदवारको विरुद्ध उजुरी दिन सकिने जानकारी दिएको थियो ।  

अब आयोगले आज र भोली उजुरीमाथि जाँचबुझ गरी नामावली प्रकाशन गर्ने, २७ गते उम्मेदवारी फिर्ता लिन सक्ने र २८ उम्मेदवारलाई निर्वाचन चिन्ह प्रदान गर्ने कार्यतालिका रहेको जानकारी दिएको छ ।

राष्ट्रिय सभा निर्वाचनमा प्रदेशसभा सदस्य, गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख मतदाता हुने कानुनी व्यवस्था छ । सोबमोजिम प्रदेशसभा सदस्य ५४५ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुख एक हजार ४९८ गरी दुई हजार ४३ प्रारम्भिक मतदाता नामावली स्वीकृत भएको ती मतदातामध्ये प्रदेशसभाका सदस्यको मतभार ५३ र गाउँपालिकाका अध्यक्ष र उपाध्यक्ष तथा नगरपालिकाका प्रमुख र उपप्रमुखको मतभार १९ रहेको छ ।